Home آخر الأخبار من عُرفت بإسم سِت البنات .. من هي ؟

عُرفت بإسم سِت البنات .. من هي ؟

501
0
SHARE

 

ست البنات
من كام يوم وانا ماشي مع أبانوب صاحبي .. قالي تعالى أشربك حاجه من على النصبة اللي هناك دي , قولتله نصبة ايه اللي هنقف نشرب من عليها حاجه في الشارع ؟؟!! ما أحنا رايحين نقعد في كافيه !!! .. قالي تعالى بس ومش هتندم
ولقيته طلع على الرصيف وبيسلم على “منة” .. قولت ايه ده معقول البنت دي هي اللي واقفه على النصبه في الشارع !!!, وطبعا أندهاشي كان نتيجة ان مش هو ده شكل البنات اللي بيقفوا على نصبة يبيعوا شاي في الشارع (مع احترامي وتقديري الشديد للبنات التانيه) بس مش هو ده اللي احنا واخدين عليه في مصر

طبعا اتكسفت من نفسي وحطيت لساني في بؤي وسكت وقعدت اراقب المكان والتفاصيل كأنه مشهد سينما و”منة” بطلته .. منة واقفه على رصيف جامع “جركس” جنب وزارة الاوقاف في وسط البلد وعامله مشروع من جهودها الذاتيه أسمه “النصبة” منضفه المكان اللي حواليها كأنك بالظبط داخل أوضة بنت متروقة ومنظمة جدا , جمبها بكام متر على نفس الرصيف راجل من ساكني الارصفه زي كتير في بلادنا .. ومنة بتروح وتديله حاجه يشربها تدفيه في عز الشتا وكأنه أصبح فرد من أسرتها ومسؤل منها .. قدمتلنا المنيو ولقيت عندها حاجات كتير تتشرب وعرفت وقتها انها مش مجرد نصبة ده بذرة مشروع كبير بتحلم يبقى عندها .. طلبت “هوت شوكليت” وحقيقي كان أحلى هوت شوكليت شربته في حياتي والاسعار مفيش أرخص من كده .. بقيت واقف ببصلها بإنبهار وبقول لنفسي ده انا ماقدرش اعمل اللي هي بتعمله ده .. مشيت من عندها وانا كلي طاقه إيجابيه بسببها وحسيت بشوية أمل

النهارده عرفت ان النصبة إتقفلت واتخضيت جدا لما عرفت ده .. فحاولت أوصل عن طريق أبانوب لمنة علشان أعرف ايه اللي حصل يمكن أقدر اساعد

هنقل ليكم الكلام اللي “منة” قالتهولي بالظبط
-مش لاقية مكان اقف فيه و الناس اللي في المكان بيضايقوني و حصل مشاكل كتير و الناس قالولي ماتجيش تانى .. الجيران اللى في العمارة اللى قدامي بيبلغوا عني الحكومة علشان ماقفش و في واحد في العمارة بينزل بالكلب بتاعه يخليه يعمل ببي عالرصيف علشان يضايقني ويتخانق و معاون قسم عابدين نزل بهدلني و قالى انتى واقفة علي رصيف الحكومة مش عاوز اشوفك هنا تاني .. هما سايبين الناس والكلاب تعمل بيبي عالرصيف انما ناكل عيش عليه لا نبقي مجرمين وولاد وسخة

تخيلوا معايا ان فيه بنت بتدرس في كلية حقوق اتحدت كل الظروف علشان تساعد نفسها وعملت اللي كتير من الشباب يتكسف يعمله وده من غير ما تعمل اي حاجه غلط او تسرق .. أستحملت كل المشاكل دي من شهر 8 اللي فات علشان رافضه حلمها يفشل بس خلاص تعبت مش قادره تكمل لأن كل الناس ضدها من أول الحكومه اللي المفروض تشغلها لحد سكان العماره اللي قدامها اللي يا حرام مضايقهم أوي شكلها
وبعد كده يقولوا الشباب عايز يهج من البلد ويسيبها او يقولوا شباب صايع مش عارفين يشتغلوا .. ولما بنت فكرت تشتغل بشرف الكل بقى ضدها

منة مش محتاجه حاجه غير انها تقف في مكان محترم علشان الناس تشوفها وتعرفها ومن غير ما الحكومه تضايقها .. حلم بسيط جدا لكن للأسف مش قادره تحققه .

*حاول تساعد واعمل شير لحكاية “منة” يمكن مشروعها وحلمها يرجع تاني